Öpper zahlt immer de Priis

All Wuche es T-Shirt für drei Franke

heisst für die eine

Mode praktisch zum Nulltarif.

Für die andere Chinderarbet und zerstörti Umwäut.

 

Aber isch eifach, geseht schön us und tuet nid weh.

Du muesch dich nid kümmere.

Weisch,

öpper ander zahlt de Priis.

 

 

Surfe und downloade im Netz

heisst für die eine

alles sofort gratis zur Verfüegig ha.

Für die andere

z'eiget Handwärk wo si Wärt verlürt.

 

Aber isch egal, öb recherchiert oder gfaked.

Es tuet nid weh und du muesch dich nid kümmere.

Weisch,

öpper ander zahlt de Priis.

 

 

Steigerig vo de Effiziänz und Maximierig vo de Rändite

heisst für die eine

es neus Software-Programm.

Für die andere

Stelleverlust und es Loch im Portemonnaie.

 

Aber isch gäbig, geit schnöuer und tuet nid weh.

Du muesch di nid kümmere.

Weisch,

öpper ander zahlt de Priis.

 

 

Es elegants Nullsummespiili uf em Papier

heisst für die eine

choschteneutral umsetze.

Für die andere

meh schaffe für weniger Gäld.

 

Aber es sig notwändig und es sig gspart.

Und ja, es tuet scho chli weh.

Es tuet mit kümmere.

Weisch,

öpper bin ich, jetzt zahl ich de Priis.

 

 

Äneluege und entscheide, um jede Priis

heisst

bestimme, was mer chouft und wär mer zahlt.

Zu welem Priis,

das isch hüt mängisch schwierig z wüsse.

 

Aber eis weisch genau.

Es tuet weh und du muesch di kümmere.

Weisch,

öpper bisch du,

öpper bin ich,

öpper si alli.

 

Mier zahle de Priis.